Приходите од турскиот туризам во првите девет месеци од оваа година достигнаа 51,3 милијарди долари, што, како што изјави турскиот министер за култура и туризам, Мехмет Нури Ерсој, е највисокиот износ досега забележан за тој период од годината.
Според Турската агенција за промоција и развој на туризмот (TGA), приходите се зголемиле за 2,4 проценти во споредба со првите девет месеци од минатата година, а само во третиот квартал, од јули до септември, приходите се зголемиле за пет проценти и достигнале рекордни 25,5 милијарди долари.
Турција годинава ја посетиле 49,1 милиони туристи, а трите најголеми пазари биле Русија, со 5,7 милиони гости, Германија, со 5,17 милиони и Обединетото Кралство, со 3,2 милиони, се наведува во соопштението.
Туристите престојувале во просек 10,34 ноќевања, што претставува зголемување од 0,3 проценти во однос на претходната година, а просечната потрошувачка по ноќевање се зголемила за 4,6 проценти, на 107,7 долари.
На прес-конференција во Истанбул, Ерсој рече дека меѓународните патувања се соочиле со големи предизвици оваа година и дека, и покрај ова, Турција се издвојува како „остров на стабилност“.
Тој најави дека TGA ќе се фокусира на интензивирање на своите активности на пазарите во Северна и Јужна Америка, Канада, Источна Азија, Африка и Океанија.