Извршниот директор на Мерцедес-Бенц, Ола Келениус, го повика Брисел да ги намали тарифите за увоз на електрични автомобили од Кина, бидејќи Европската комисија размислува за зголемување на увозните давачки поради истрагата за субвенциите на Пекинг за домашната автомобилска индустрија.
Зголемената конкуренција од Кина ќе им помогне на европските производители на автомобили да произведуваат подобри возила на долг рок, рече Келениус, додавајќи дека протекционизмот „оди по погрешен пат“, пишува Фајненшл тајмс.
Тој ја повика ЕУ да не ги зголемува дополнително царините, туку да ги намали постојните. Според него, кинеските компании кои сакаат да извезуваат во Европа треба да се сретнат со подобар производ, подобра технологија и поголема агилност.
„Тоа е пазарна економија. Нека има конкуренција“, изјави првиот човек на Мерцедес.
ЕК истражува дали кинеските производители на автомобили добиваат субвенции од Пекинг што им овозможуваат да ги намалат цените на возилата што ги извезуваат во Европа, со што се поткопува конкуренцијата. Француските производители Renault и Stellantis, кои немаат големи бизниси во Кина, предупредуваат на заканата од кинеските електрични возила.
Истрагата, сепак, се соочи со реакција од германските производители на автомобили кои се потпираат на Кина за значителен дел од нивната продажба и профит.
Германските директори стравуваат од потенцијална одмазда од Пекинг и кинеските потрошувачи во време кога локалните брендови како BYD веќе преземаат пазарен удел од западните компании на најголемиот светски пазар на електрични автомобили.
Повеќе од една третина од автомобилите на Мерцедес се продаваат во Кина, додека Фолксваген продава 40 отсто од своите возила во таа земја.
Кинеските производители на автомобили Geely и државната SAIC поседуваат петтина од акциите во Mercedes-Benz.
Фото: Facebook
