Директорот на Nvidia, Јенсен Хуанг, изјави дека развојот на вештачката интелигенција и роботиката нема да значи помалку работа за луѓето, туку спротивното – повеќе работа и одговорности. Во гостувањето во Fox Business, тој истакна дека во иднина „сè што се движи ќе стане роботизирано“, од болници и фабрики до земјоделство.
Хуанг верува дека хуманоидните и специјализираните роботи ќе бидат присутни во сите индустрии, додека компаниите ќе користат вештачка интелигенција за да ги забрзаат процесите и да ја зголемат продуктивноста. Сепак, тој нагласува дека ова не значи крај на работата за луѓето. „Ќе бидеме позафатени од кога било бидејќи кога задачите се завршуваат побрзо, има повеќе простор за нови идеи“, рече Хуанг.
Тој додаде дека скратена работна недела би била пожелна, но верува дека реалноста ќе биде поинаква. Потсети дека секоја индустриска револуција го менувала општеството – некои работни места исчезнуваат, се создаваат многу нови и сите се менуваат под влијание на вештачката интелигенција.
Вештачката интелигенција носи раст, но и повеќе работа
Хуанг очекува вештачката интелигенција да го зголеми БДП и продуктивноста, но и обемот на работа. „Ќе имаме повеќе да направиме од кога било досега“, рече тој, истакнувајќи дека историјата покажала промена од седумдневна на петдневна работна недела, па затоа верува дека промената на четири дена е можна. Сепак, тој верува дека во пракса вештачката интелигенција ќе донесе повеќе задачи, повеќе одлуки и поголем притисок за спроведување нови идеи.
За разлика од Илон Маск, кој замислува свет во кој роботите работат додека луѓето добиваат универзален приход, Хуанг е убеден дека технологијата ќе го подобри квалитетот на животот, но ќе донесе и дополнителна работа. „Некои работни места ќе бидат заменети со вештачка интелигенција, многу сепак ќе бидат создадени, но едно е сигурно – секое работно место ќе биде променето“, заклучи директорот на Nvidia.