Германската модна компанија Хуго Бос денес објави дека нејзината оперативна добивка (EBIT) во првиот квартал од 2026 година паднала на 35 милиони евра, но и покрај ова, таа ја надминала просечната прогноза на аналитичарите од 30 милиони евра, а пазарите реагирале со зголемување на акциите за речиси пет проценти.
Извршниот директор на компанијата, Даниел Гридер, изјавил дека почетокот на годината бил во согласност со планот за реструктуирање, но дека пазарната средина станала значително потешка поради геополитичките настани околу Ормутскиот теснец, пренесува Ројтерс.
Војната меѓу Соединетите Американски Држави и Израел против Иран негативно влијаела врз потрошувачката и продажбата на клучните пазари, особено на Блискиот Исток.
Компанијата истакнала дека падот на посетите на продавниците во тој регион започнал во март, додека глобалната побарувачка на потрошувачите останала слаба.
Хуго Бос проценува дека глобалните трендови и ефектите од војната ја намалиле вкупната продажба за околу еден процент, додека досега не е регистрирано никакво директно нарушување во синџирите на снабдување.
Вкупните приходи од продажба се намалија за шест проценти на годишно ниво на 905 милиони евра, што одразува намерно прилагодување на брендот и продажните канали како дел од стратегијата.
Иако приходите се пониски, Хуго Бос забележа подобрување на бруто маржата на 62,5 проценти, како и раст на слободниот паричен тек на 33 милиони евра, во споредба со негативните 66 милиони евра една година претходно.
Во исто време, компанијата продолжува со реструктуирање, вклучително и затворање продавници и оптимизирање на дистрибутивната мрежа, додека фокусот е на зајакнување на брендот преку модни настани како што е Неделата на модата во Милано и кампањи за нови колекции, објавува порталот Fashion Network.
Хуго Бос ја задржа својата претходна годишна прогноза и очекува оперативен профит во опсег од 300 до 350 милиони евра во 2026 година, објавува Танјуг.