На светските берзи вредноста на доларот во однос на кошничката валути падна и минатата недела, трет пат по ред, но значително флуктуираше, во зависност од тоа какви шпекулации за зголемувањето на каматните стапки на ФЕД преовладуваат на пазарот.
Индексот на доларот, кој го покажува движењето на американската вредност во однос на другите шест најважни светски валути, минатата недела падна за 0,5 отсто, на 110,75 поени.
Истовремено, доларот зајакна за 0,05 отсто во однос на европската валута, па цената на еврото се лизна на 0,9960 долари.
Сепак, курсот на доларот падна во однос на јапонската валута за 0,6 отсто, на 146,60 јени.
Големи дневни осцилации
Падот на доларот трета недела по ред следеше по големи дневни флуктуации, во зависност од тоа какви шпекулации преовладуваа на пазарот во врска со зголемувањето на каматните стапки од страна на американската централна банка.
Во текот на неделата, индексот на доларот достигна и 112,70 поени, откако во средата американскиот ФЕД повторно ги зголеми, четврта седница по ред, клучните каматни стапки за агресивни 0,75 процентни поени, на распон од 3,75 до 4 отсто, највисокo од почетокот на 2008 година.
Вакво брзо затегнување на монетарната политика не е забележано од раните 1980-ти, кога инфлацијата беше исто толку висока како што е сега. На пазарот се очекуваше ново зголемување на каматите, како и пораката од соопштението на централната банка дека стапката на пораст на цената на парите во иднина може да забави.
