ЕБОР, ЕУ и Австрија финансираат енергетска ефикасност во Северна Македонија

57

Европската банка за обнова и развој (ЕБОР) обезбедува кредит од 2 милиони евра за ПроКредит банка за кредитирање на домаќинствата за инвестиции во енергетска ефикасност. Кредитната линија е дел од програмата Финансиска програма за зелена економија (Green Economy Financing Facility – GEFF) .

Средствата ќе бидат достапни на физички лица за инвестиции во мерки за заштеда на енергија, како што се изолација, прозорци, пумпи за загревање, соларни панели, итн. Инвестициите ќе придонесат во подобрување на енергетската ефикасност на станбените згради, помагајќи да се намали емисијата на гасовите кои креираат ефект на стаклена градина, и ќе го подобрат квалитетот на живот на сопствениците на домаќинствата. Откако мерките ќе бидат успешно применети, кредитобарателите ќе можат да добијат грант до 20 отсто од вредноста на кредитот, што претставува поддршка финансирана од Европската унија (ЕУ) .

Финансирањето во износ од 135 милиони евра е обезбедено преку ГЕФФ Програмата за Западен Балкан, која е кофинансирана од ЕУ, Инвестициската програма за Западен Балкан (ИПЗБ) и Австриското федерално Министерство за финансии, и е дел од Регионалната програма за енергетска ефикаснсот (РПЕЕ) за Западен Балкан. Целта на програмата е да се поддржи регионот, познат по високиот енергетски интензитет, да се подобри енергетската ефикасност кај домаќинствата, кои се едни од најголемите потрошувачи на енергија.

„Среќни сме што ја продлабочуваме соработката со нашиот партнер ПроКредит Банка Македонија, со потпишување на уште еден договор од ГЕФФ програмата. Присаството на овој производ на пазарот го зголеми интересот на локалните домаќинства за важноста на инвестициите од енергетска ефикасност за нивните домови. Средствата од оваа нова кредитна линија ќе бидат достапни до уште повеќе домаќинства, намалувајќи ја нивната потрошувачка на енергија и придонесувајќи кон подобар квалитет на воздух во нивните домаќинства“, вели Јурген Ригтеринк, Прв подпретседател на ЕБОР и Главен на Групацијата за услуги кон клиент.

Стефен Худолин, Раководител на Одделот за соработка, од Делегацијата на Европска унија во Северна Македонија вели дека заштедата на енергија денес, е заштеда за нашата иднина.

„Заради тоа користиме практични начини, достапни за граѓаните, за да ја имплементираме Зелената агенда и да обезбедиме финансиска поддршка на станбениот сектор. Ова ќе разреши дел од финансиските бариери за подобрување на енергетската ефикасност”, вели Худолин.

Како што истакнува Емилија Спировска, Член на Управниот одбор на ПроКредит банка Македонија влијанието кое како компанија, заедно со клиентите би можеле да го имаат на човековата околина е од големо значење.

ПроКредит банка Македонија веќе има пласирано 2 милиони евра преку 172 кредита од ГЕФФ програмата, целосно наменети за домаќинствата.

До денес, околу 9.000 домаќинства на Западен Балкан ја подобрија сопствената енергетска ефикасност преку ГЕФФ програмата, преку инвестиции во проекти кои придонесуваат во намалување на над 10.000 тони јаглероден диоксид годишно, што е еднакво на отстранување на 6.000 автомобили на патиштата.

ЕБОР е главен институционален инвеститор во Северна Македонија. До денес има инвестирано над 2,14 милијарди евра преку 148 проекти во земјата. Поддршка на зелена енергија е приоритет за Банката, бидејќи преку тоа се решава еден од најголемите предизвици во земјата, се вели во соопштението до медиумите.