Енергетската криза поврзана со конфликтот на Блискиот Исток во моментов е најголемата закана за европската економија, бидејќи истовремено влијае на растот на цените и ја забавува економската активност, изјави претседателката на Европската централна банка (ЕЦБ), Кристин Лагард.
Во интервју за францускиот весник „Ла Кроа“, објавено на веб-страницата на ЕЦБ, таа истакна дека стабилноста на цените останува приоритет за институцијата предводена од неа.
Затоа главната закана денес е енергетската криза поврзана со конфликтот на Блискиот Исток, а таа јасно влијае на цените, но и на растот – рече Лагард.
ЕЦБ се обидува да спречи енергетскиот шок да се прелее во економијата
Претседателката на ЕЦБ оцени дека европскиот економски модел е потресен бидејќи три од неговите долгорочни потпори – евтината енергија, особено од Русија, големиот кинески пазар за европски извоз и американската безбедносна рамка – денес се под неповолни влијанија.
Според неа, снабдувањето со енергија од Русија е прекинато, додека Кина сè повеќе се натпреварува со европските компании на пазарите на напредни технологии.
Лагард изјави дека ЕЦБ не може да го врати снабдувањето преку Ормутскиот теснец или да создаде нови резерви на нафта и гас, туку настојува да спречи енергетскиот шок трајно да се прелее во остатокот од економијата и да предизвика долгорочен пораст на инфлацијата.
Таа додаде дека таквата ситуација би можела да бара зголемување на каматните стапки, што истовремено би ги зголемило трошоците за финансирање и би го оптоварило економскиот раст.
Според неа, ЕЦБ е водена од податоци во донесувањето одлуки за монетарната политика и е подготвена да ја прилагоди својата политика на променливите околности.
Погрешна проценка на ЕЦБ од 2021 година
Лагард, исто така, рече дека во 2021 година, централната банка погрешно проценила дека енергетскиот шок ќе биде привремен и призна дека не го предвидела начинот на кој различните кризи ќе бидат меѓусебно поврзани.
Зборувајќи за економските изгледи на еврозоната, Лагард изјави дека ЕЦБ годинава очекува раст од 0,9 отсто.