Растот на платите во еврозоната се забавува бидејќи работодавците ги намалуваат бонусите, покажа во средата истражувањето на Европската централна банка (ЕЦБ), додавајќи им на проценките на ЕЦБ дека инфлацијата треба да ослаби во услови на затегната монетарна политика која ги ограничи трошоците и инвестициите.
„Неодамна работодавачите почнаа да ги намалуваат надоместоците за прекувремена работа и надоместоците за приспособување на платите на инфлацијата, така што разликата меѓу договорениот и исплатениот износ е намалена. „Ова веројатно е знак дека притисоците што го поттикнаа растот на потрошувачките цени ќе се намалат“, заклучуваат авторите во истражувањето.
Во процесот на забавување на инфлацијата, ЕУ дојде до точка кога притисокот на платите врз растот на потрошувачките цени почна да слабее, објаснуваат во анализата, што значи, како што оценуваат, дека ЕЦБ повторно ќе го префрли фокусот на договорените износи на плати при креирање на монетарната политика.
„Притисокот на трошоците за работна сила се намалува, а приходите на компаниите делумно го амортизираат влијанието на повисоките плати врз инфлацијата. Условите за финансирање се сè уште рестриктивни, а економската активност е пригушена, што одразува слаба лична потрошувачка и инвестиции“, се наведува во соопштението.
Во периодот од април до јуни, според Хина, договорените плати се зголемени во зоната на примена на заедничката европска валута за 4,3 отсто, покажуваат податоците на ЕЦБ. Во првите три месеци од годинава тие се зголемени за 4,7 отсто.
Растот на платите во пролетниот квартал сепак беше посилен отколку што би било потребно за да се намали стапката на инфлација на два отсто, но ЕЦБ сепак проценува дека растот на цените ќе ослаби и ќе го достигне целното ниво во втората половина на следната година.