Една четвртина од светските извршни директори очекуваат имплементацијата на генеративната вештачка интелигенција да доведе до намалување на бројот на вработени за најмалку пет проценти оваа година, според истражувањето објавено на собирот на светските и деловните лидери на Светскиот економски форум во Давос.
Медиумите, забавата, банкарството, осигурителната и логистичката индустрија најверојатно ќе претрпат загуба на работни места поради најсовремените алатки за вештачка интелигенција, според истражувањето на директорите спроведено од PwC пред Давос. Инженерските и градежните фирми најмалку очекуваат кратење на работните места поради автоматизација, како и технолошките компании, пишува „Фајненшл тајмс“.
Околу 46 отсто од испитаниците рекле дека очекуваат употребата на генеративна вештачка интелигенција, системи кои можат да исплукаат текст, фотографии и код слични на човекот за неколку секунди, да ја зголемат профитабилноста во следните 12 месеци, покажа истражувањето. Во исто време, 47 отсто од директорите веруваат дека технологијата ќе донесе мала или никаква промена.
Резултатите, засновани на интервјуа со 4.702 директори на компании од 105 земји, укажуваат на далекусежните влијанија што се очекува да ги имаат моделите со вештачка интелигенција врз економиите и општествата, тема што ќе биде истакната на состаноците во Давос.
Директорите на чело на компаниите за вештачка интелигенција, вклучително и шефот на OpenAI Сем Алтман и Сатја Надела од Мајкрософт, ќе учествуваат на тие состаноци. Додека многу економисти известуваат дека очекуваат вештачката интелигенција да доведе до зголемена продуктивност, таа исто така ќе има влијание врз работната сила.
Истражувањето на PwC покажа дека сè поголем број директори предвидуваат зајакнување на економскиот раст во 2024 година, но исто така се водени од потребата да се одговори на револуционерниот развој, вклучително и генеративната вештачка интелигенција и климатските промени.
Се поголем број директори планираат да имплементираат генеративна вештачка интелигенција во наредните месеци, покажа истражувањето, откако 32 отсто од директорите изјавија дека усвоиле технологија за вештачка интелигенција во нивната компанија минатата година. Околу 58 отсто рекле дека очекуваат тоа да го подобри квалитетот на нивните производи или услуги во следните 12 месеци, додека 69 отсто рекле дека нивните вработени ќе треба да научат нови вештини.