Помина една многу успешна година од денот кога најголем дел од членовите на здружението Тиквешки семејни винарии се впишаа во регистарот на производители на вино.
“И во време на пандемија произведовме врвни вина кои се закитија со многу домашни и меѓународни награди годинава. Ова го истакна синоќа претседателот на Здружението со седиште во Кавадарци, Горан Јаковлевски, по, како што рече, една година од остварувањето на нивната желба, вината од семејните винарии, да си го најдат своето место на трпезите, маркетите и угостителските објекти.
Јаковлевски потсети дека по законските олеснувања, пред една година започна регистрацијата на малите семејни винарии и додаде дека сега, регистрирани се педесетина фамилијарни вински бизниси во целата држава, најмногу во Тиквешијата, пренесува МИА.
“Се спремаме за новиот гроздобер, имаме квалитетен род во лозјата и очекуваме успешна берба. Тројца од нашите членови добија грантови, поддршка за млади земјоделци од по дваесет илјади евра, за опрема во своите вински капацитети“, потсети Јаковлевски.
Фото: Pixabay
