Американската компанија ExxonMobil ја тужи Европската унија во обид да ја принуди да го укине новиот данок на неочекуваните приходи на нафта, тврдејќи дека Брисел ги пречекорил своите законски овластувања со воведувањето на давачката.
Тужбата е најзначајниот одговор на данокот досега за нафтената индустрија, која беше цел на западните влади поради зголемените цени на енергијата. Тужбата ја загрозува одржливоста на новиот данок, за кој Европската комисија проценува дека ќе собере 25 милијарди евра „за да помогне во намалувањето на сметките за енергија“, пишува Financial Times.
Ексон соопшти дека тужбата била поднесена во средата од нејзините германски и холандски подружници до Европскиот општ суд во Луксембург.
Компанијата ги оспорува овластувањата на Советот на ЕУ да го наметне новиот данок, бидејќи таа моќ им припаѓа на суверени земји, како и употребата на овластувањата за вонредни состојби од страна на Советот за да обезбеди согласност на земјите-членки за мерката.
Американската компанија рече дека разбира дека високите трошоци за енергија вршат притисок врз семејствата и бизнисите, но тврди дека данокот е „контрапродуктивен“ и „ќе ја поткопа довербата на инвеститорите и ќе ги обесхрабри инвеститорите“. Нафтената компанија во третиот квартал оствари рекорден глобален профит од околу 20 милијарди долари.
Ексон потроши 3 милијарди долари на европски проекти во изминатите 10 години, зголемувајќи го производството додека Европа се бори да го намали увозот на енергија од Русија, соопшти американската компанија.