На европските берзи во петокот наутро индексите пораснаа, по тридневен пад, што најмногу се должи на растот на цените на акциите во енергетскиот сектор, бидејќи цената на нафтата порасна.
Индексот STOXX 600 на водечките европски акции се зголеми за 0,4 отсто во 9:30 часот, намалувајќи ги загубите од претходните три дена.
Истовремено, лондонскиот FTSE индекс зајакна за 0,60 отсто, на 8.228 поени, додека франкфуртски DAX се зголеми за 0,47 отсто, на 18.295 поени, а париски CAC за 0,06 отсто, на 7.535 поени.
Растот на индексот најмногу се должи на скокот на цените на акциите во енергетскиот сектор, во просек за 1 отсто, со оглед на тоа што цената на нафтата трета недела по ред е на пат кон добивки.
Цените на акциите пораснаа и на азиските берзи. Индексот MSCI на азиско-пацифичките акции, без јапонските акции, порасна за 0,3 отсто во 9:30 часот и е на пат да добие повеќе од 3 отсто овој месец.
Истовремено, јапонскиот индекс Никеи зајакна за 0,6 отсто, додека цените на акциите во Јужна Кореја, Австралија, Хонг Конг и Шангај пораснаа меѓу 0,1 и 0,7 отсто.
Азиските инвеститори се претпазливи бидејќи се загрижени од зголемената инфлација во неколку земји, вклучувајќи ги Австралија и Канада.
Долго време на пазарите се сметаше дека циклусот на зголемување на каматните стапки во светот е завршен и дека следува олабавување на монетарната политика.
Сепак, растот на инфлацијата во Австралија и пораката од тамошната централна банка дека на последната седница се разговарало за зголемување на каматните стапки предизвика страв од дополнително заострување на монетарната политика.
