Употребата на вештачка интелигенција во финансиите сè уште не е широко распространета, но треба да се следи и евентуално да се регулира со цел да се спречи штета на потрошувачите и да се обезбеди правилно функционирање на пазарот, објави Европската централна банка (EЦБ).
ЕЦБ идентификуваше голем број можности за банките и другите финансиски институции во користењето на генеративната вештачка интелигенција, како што се супериорна обработка на информации, поефикасна услуга за клиентите и уште поголема способност за откривање сајбер закани.
Но, тој исто така предупреди на ризиците кои вклучуваат преголемо потпирање на ограничен број даватели на услуги и софистицирани сајбер напади.
„Затоа, имплементацијата на вештачката интелигенција низ финансискиот систем треба внимателно да се следи како што се развива технологијата“, наведе ЕЦБ во написот објавен како дел од редовниот преглед на финансиската стабилност.
„Можеби ќе биде неопходно да се разгледаат регулаторни иницијативи доколку станат очигледни недостатоци на пазарот кои не можат да се решат со сегашната кредитна рамка“, предупредува банката.
Европската унија ги формулираше првите правила за вештачка интелигенција во светот, кои ќе ги принудат системите за вештачка интелигенција за општа намена и висок ризик да се усогласат со специфичните обврски за транспарентност и законите на ЕУ за авторски права. Но, ЕЦБ смета дека засега усвојувањето на вакви системи од европските финансиски компании е само во рана фаза, пренесува Хина.
„Пазарните контакти укажуваат дека финансиските институции во еврозоната може побавно да ја усвојат генеративната вештачка интелигенција, со оглед на опсегот на ризици што беа дискутирани погоре, како и потенцијалните ризици за репутацијата“, додава ЕЦБ.