Европската комисија планира во вторник да предложи законска забрана за увоз на руски природен и течен гас во Европската Унија до крајот на 2027 година, со цел постепено да се прекинат енергетските врски со Русија.
Според нацрт-документот што го виде Ројтерс, забраната формално би била воведена од 1 јануари 2026 година, со одредени исклучоци за краткорочни договори потпишани пред 17 јуни 2025 година, кои би важеле уште една година, до 17 јуни 2026 година.
Долгорочните договори би биле прекинати најдоцна до 1 јануари 2028 година.
Како што е наведено, Комисијата ќе користи законска основа што не бара едногласност од сите членови, со што би се избегнало блокирање на земји како Унгарија и Словачка, кои продолжуваат да увезуваат руски гас и се спротивставуваат на забраните.
Еврокомесарот за енергетика, Дан Јоргенсен, изјави дека предложените мерки би биле правно доволно силни за да им овозможат на компаниите да се повикаат на клаузула за „виша сила“ за да ги прекинат своите договори за руски гас.
Планот предвидува забрана за обезбедување услуги за руски клиенти на европските терминали за течен природен гас, како и обврска на увозниците да доставуваат информации за нивните договори до националните и европските власти.
Во моментов, околу 19 проценти од гасот во ЕУ доаѓа од Русија, додека пред 2022 година тој удел изнесуваше околу 45 проценти.
Меѓу земјите што сè уште увезуваат руски течен гас се Белгија, Франција, Холандија и Шпанија.
Францускиот министер за индустрија, Марк Ферачи, рече дека Париз ја поддржува забраната „во принцип“, но дека е важно да се обезбеди правна и економска сигурност за европските бизниси.
Фото: Pixabay