Европската унија се подготвува да обезбеди до 40 милијарди евра нови заеми за Украина до крајот на годината, без оглед на ангажманот на САД, по планот на Г7 да ги користи замрзнатите руски средства за да му помогне на Киев да се справи со пречките.
Едностраната иницијатива доаѓа во услови на загриженост во Брисел дека Унгарија ќе ја спречи ЕУ да ги обезбеди потребните гаранции што САД ги бараат да учествуваат во шемата за замрзнати средства, според три лица вклучени во преговорите, пишува Фајненшл тајмс.
Владата на унгарскиот премиер Виктор Орбан, која претседава со ЕУ, се обидува да ја одложи одлуката за шемата за замрзнување на имотот до по претседателските избори во САД на 5 ноември. Сепак, Брисел бара да започне со работа на која било алтернатива во наредните недели, бидејќи овластувањата што дозволуваат таков потег истекува на крајот на годината.
Средствата се наменети за стабилност на украинските финансии, бидејќи според владата во Киев и ММФ, Украина се соочува со дефицит од 38 милијарди долари во 2025 година. Земјата зависи од странската помош за да продолжи да функционира додека Русија ги засилува нападите врз нејзината инфраструктура.
Според нацрт-правниот предлог, ЕУ до крајот на 2024 година ќе и собере неодреден број милијарди заеми за Украина. Потегот, кој ја проширува постоечката програма за помош, бара само поддршка од мнозинството, што би го елиминирало правото на вето на Будимпешта.
Конечната сума би можела да биде меѓу 20 и 40 милијарди евра, што ќе ја утврди Европската комисија по консултација со земјите-членки. Иако првичната шема во која се вклучени САД останува План А, официјалните лица веруваат дека е неопходно да се има алтернатива доколку Будимпешта го задржи своето вето до изборите во САД.
