Издавањето станови на туристи е болка со која се борат голем број европски градови. Има сè повеќе станови, сè помалку станари – и конечно Брисел подготвува нови правила.
Најлошо е во туристичките дестинации кои сами по себе не се особено големи – како Палма во Мајорка. Сè повеќе сопственици на станови ги издаваат на туристи, што значи дека жителите на тој град едвај ги плаќаат тие цени – практично е невозможно да се најде нешто под 900 евра месечно.
Иако сопствениците добро заработуваат, тоа е севкупна катастрофа: наемците речиси и да не се грижат за зградата или нивните соседи, во сезоната е невозможно рестораните и трговците да најдат сместување за некој да работи за нив, па дури и во вон сезона. Што е уште полошо, многу од овие станови се изнајмуваат „на црно“ па нема даночен приход, пишува ДВ.
Не е крив посредникот!
И ова е проблем кој ги мачи и големите градови како Париз, Амстердам, Рим… Се воведуваат строги ограничувања на бројот на станови, веќе е речиси невозможно да се добие туристичка дозвола за изнајмување. Сите регистри и прописи водат само до тоа дека многу работи се одвиваат без никакви закони, па дури и италијанската министерка за туризам Даниела Сантанче напоена дека „треба вистинска регулатива“.
Затоа што проблем се и платформите како Airbnb. Веќе има стотици илјади станови кои се нудат низ Европа, но кога Балеарските Острови поведоа кривична постапка против порталот за нудење нелегални станови на него, судот го ослободи интернет порталот. Бидејќи е само посредник, виновникот е сопственикот на станот. На ова во Брисел се пожали и министерот за туризам на Балеарите, Јаго Негеруела, за кого е „неприфатливо платформите како Airbnb да нудат станови кои се нелегални“.
Само оние со дозвола
Токму тоа е патот по кој сака да оди Европската унија. Во сите земји-членки ќе се воведе обврска за регистрирање на станови кои се издаваат на туристи, а таквите портали ќе треба да проверат дали станот има дозвола за да им биде дозволено да го стават во својата понуда. Европската комисија е убедена дека на овој начин „ќе има значително помалку незаконски понуди“, како и дека ќе има „поголеми можности надлежните служби да ги ублажат штетните последици од овој вид краткорочно изнајмување станови“.
Оваа европска регулатива би можела да стапи на сила веќе следната година, а многу градови во Европа со нетрпение ја очекуваат: Џенет Санз од Барселона смета дека е „прв чекор во вистинската насока“, и бара уште построги правила за интернет порталите кои нудат станови. А во Берлин едвај ја чекаат новата европска регулатива. Секретарот за европски интеграции на овој град-држава Џери Вуп смета дека регулативата е веќе „практична“ и ќе им помогне подобро да ги следат и казнуваат криминалците, пишува ДВ.
Бидејќи и Берлин страда од овој проблем: за „нормалните“ Берлинчани веќе е речиси невозможно да најдат стан за кој можат да платат, а само во 2019 година имаше 26.500 станови понудени во Берлин само на Airbnb – и веројатно уште повеќе оттогаш. Airbnb не е единствениот портал во овој бизнис.
Кога станува збор за санкциите, националните влади треба да направат нешто – ако навистина сакаат. На Мајорка во првите три месеци се проверени 337 случаи на издавање станови, а во 45 случаи е покрената постапка и наплата на глоби. А тоа е лоша вест во Мајорка за сопственикот на ваков нелегален стан.
Предвидена е казна од 40.000 до 400.000 евра.
