Франција сака Европската унија да усвои индустриска стратегија „Произведено во Европа“ како одговор на американската шема за субвенционирање на зелените инвестиции, со цел да се спречи заминувањето на индустриските компании од Европа и да се намали зависноста на членките на ЕУ од надворешни добавувачи.
Лидерите на ЕУ ќе разговараат за индустриската политика на самитот од 9 до 10 февруари во Брисел, загрижени дека Законот за антиинфлација на Вашингтон од 369 милијарди долари за субвенционирање на производи од батерии до електрични автомобили, соларни панели и турбини на ветер ги оддалечува компаниите од ЕУ, пренесува Ројтерс.
„Спроведувањето на амбициозна и силна европска индустриска политика е затоа клучно денес. Француските власти предлагаат тоа да биде во форма на стратегија „Произведено во Европа““, се вели во документот што го видел „Ројтерс“.
Лидерите на ЕУ се согласија минатиот март, веднаш по нападот на Русија врз Украина, што ги зголеми цените на енергијата, дека Европа мора да ја намали зависноста од странските добавувачи на енергија, клучни суровини, полупроводници, лекови и храна.
Францускиот предлог бара итни мерки, особено за задржување на европските компании кои се занимаваат со соларни панели, батерии, водород и клучни суровини, истакнувајќи дека стратегијата „Произведено во Европа“ треба да се заснова на четири столба.
Првиот столб се однесува на целите на ЕУ за намалување на зависноста од надворешни добавувачи и поставување цели за производство до 2030 година во клучните сектори кои би биле регулирани со законите на ЕУ.
Друга би била итна промена на правилата на ЕУ за државна помош за компаниите, веќе дозволени во контекст на пандемијата на Ковид-19, за да може да продолжи во одредени сектори на привремена основа.
Третиот столб треба да биде финансирањето на чувствителните сектори на ЕУ, а последниот столб треба да биде целосна мобилизација на трговската политика, вклучително и инструментите за заштита на трговијата.
