Европските банки ја повикуваат Европската унија да им додели статус на „стратешки важен“ сектор, предупредувајќи дека нивната конкурентност и раст се доведени во прашање.
Во презентацијата на Европската банкарска федерација (ЕБФ) има 45 препораки пред јунските избори за Европскиот парламент, пренесува Хина. Претседателот на здружението и извршен директор на Дојче банк, Кристијан Савинг, минатата година веќе предложи банките да добијат статус на стратешки важен сектор бидејќи, како што рече, тие се „клучен фактор за европскиот суверенитет“. Ова е првпат официјално здружение да го бара овој статус. „Клучно е да се препознае виталната и стратешка улога на банките во трансформацијата на Европа“, рече Савинг во предговорот на извештајот.
И покрај иницијативите во финансискиот сектор, Европската унија не објавува список на сектори кои ги смета за стратешки, забележува Ројтерс. Главниот извршен директор на ЕБФ, Вим Мис, на брифинг со новинарите по повод презентацијата на извештајот, рече дека Европа во изминатите 20 години ја „остави“ одбраната на САД, снабдувањето со енергија на Русија и производство во Кина на нешто што, како што рече, бара детален преглед на стратешките сектори во регионот.
