Европските рафинерии имаат повеќе нафта отколку што им е потребно

29

Се чини дека европските рафинерии сега имаат повеќе сурова нафта отколку што им е потребно, додека раната паника за намалениот извоз на руска нафта и последователниот недостиг на нафта во светот се покажа како пренадувана, пишува специјализираниот портал Oilprice.com.

Трговците со сурова нафта ја посочија способноста на Европа да набавува сурова нафта од Латинска Америка, Блискиот Исток и САД како главна причина поради која на европските рафинерии им олесна. Азија, исто така, купи помалку сурова нафта отколку што предвидуваа аналитичарите, благодарение на бескрајната борба на Кина да ја достигне неостварливата цел за нулта ковид.

Европскиот увоз на сурова нафта од Латинска Америка изнесуваше во просек 313.000 барели дневно досега оваа година. Во јули, просекот беше многу над тоа, 600.000 барели дневно. Од Соединетите Американски Држави, Европа во просек земала 1,1 милион барели дневно оваа година, во споредба со само 800.000 барели дневно минатата година. Увозот на ирачка нафта во Европа е зголемен за 20 отсто од јули до ноември во споредба со истиот период минатата година.

Преголемата понуда влијае на цените. Цените на суровата нафта Брент паѓаат, а барелот се продава за нешто повеќе од 86 долари. Еден европски трговец со сурова нафта изјави за Ројтерс дека европските рафинери „изгледа дека прекупиле во ноември и декември, веројатно поради стравувањата за Урал (руската нафта)“.

Покрај овие стравувања од панично купување, неколкунеделните штрајкови во француските рафинерии и порастот на одржувањето на рафинериите, исто така, ја намалија побарувачката за сурова нафта во Европа, бидејќи забавија испораките.

Трговците и рафинериите го зголемија купувањето ова лето, предвидувајќи недостиг што произлегува од европската забрана за увоз на руска сурова нафта. Таа забрана треба да стапи на сила на 5 декември. Дотогаш, Европа веројатно нема да има никакви проблеми со добивање доволно сурова нафта. Сепак, приказната по 5 декември би можела да биде поинаква, пишува Oilprice.com.