Количината на резерви на гас во европските подземни складишта падна под 80 отсто, покажуваат податоците на операторот „Гасна инфраструктура на Европа“.
Според последните податоци, резервите на гас во подземните складишта изнесуваат 79,49 отсто со вкупно 86,5 милијарди кубни метри гас.
Резервите на гас во европските подземни складишта сè уште се високи во споредба со минатата година, кога пополнетоста беше помала од 50 проценти, според операторот, пренесува Срна.
Западните земји воведоа широк опсег на санкции кон Русија откако Москва започна воена операција во Украина на 24 февруари 2022 година, а ЕУ вети дека ќе ја прекине зависноста од руската енергија.
Претседателката на Европската комисија, Урсула фон дер Лајен, претходно изјави дека ЕУ успеала да замени 80 отсто од гасот од гасоводот што го снабдува Русија, со намалување на домашната побарувачка и зголемување на понудата на течен природен гас од Соединетите Американски Држави.
