Претставниците на Федералните резерви сигнализираа дека планираат да ја зголемат референтната каматна стапка за 0,5 процентни поени на состанокот следната недела. Сепак, притисокот создаден од растот на платите може да ги наведе да продолжат со зголемувања кои се повисоки од прогнозите на инвеститорите.
Федералните резерви (ФЕД) годинава ги зголемуваа каматните стапки со најбрзо темпо од 1980-тите, со зголемување од 0,75 отсто на последните четири состаноци. Претседателот на ФЕД Џером Пауел минатата недела посочи дека дводневниот состанок закажан за 13 и 14 декември може да забележи зголемување од 0,5 процентни поени.
Пониска стапка на раст би означила нова фаза во сегашната монетарна политика. Неговите креатори очекуваат значително намалување на инфлациските притисоци во текот на следната година, но остриот раст на платите и повисоката инфлација во услужните сектори би можеле да ги поттикнат да ја подигнат каматната стапка над пет отсто, како што очекуваат инвеститорите во моментов, пишува The Wall Street Journal.
Со ова сакаат да се заштитат од можноста пониската каматна стапка повторно да доведе до нагло зголемување на инфлацијата или претерано високата каматна стапка да доведе до непотребно економско слабеење.
Поради тоа што е потребно време промените на каматните стапки да ја забават економијата и да влијаат на инфлацијата, „ако барате докази дека инфлацијата се намалува, ќе ви биде тешко да избегнете премногу затегнување“, рече Џером Пауел минатата недела.
„Сметаме дека забавувањето во овој момент е добар начин да се балансираат ризиците“, рече тој.
Зголемувањето на стапката од 0,5 процентни поени следната сесија ќе ја доведе референтната стапка помеѓу 4,25 отсто и 4,5 отсто, што е највисоко од декември 2007 година.
