Федералниот министер за трговија Амир Хасичевиќ најави дека првата неработна недела за продавниците во Федерацијата Босна и Херцеговина ќе биде на 17 ноември.
Хасичевиќ по средбата со претставниците на Здружението на работодавачи на ФБиХ и директорката на Федералната управа за инспекциски работи, Ивана Првуловиќ, најави дека првата неработна недела за продавниците во Федерацијата БиХ ќе биде на 17 ноември, а во случај на прекршување на законот предвидени се казни до 7.500 евра, пренесува Индекс.
Воведувањето на неработна недела во трговскиот сектор има за цел да ги подобри условите за работа и да им овозможи на вработените квалитетно време со семејството, што позитивно ќе влијае на балансот помеѓу работата и приватниот живот.
Претставниците на Здружението на работодавачи на ФБиХ ја истакнаа важноста на таа мерка за вработените во трговијата и нивните семејства, посочувајќи дека неработната недела на трговците ќе им овозможи одмор и време за лични активности и семејни обврски, што придонесува за поголемо задоволство и продуктивност на работниците.
Високи казни
Шефот на Федералната управа за инспекциски работи, Ивана Првуловиќ, рече дека инспекцијата ќе го надгледува почитувањето на овие законски мерки, а казните за прекршителите се движат до 7.500 евра. Високите казни се со цел да се обезбеди доследна примена на новиот Закон за внатрешна трговија и заштита на правата на работниците.
Претставниците на Здружението на работодавачи на ФБиХ ја пофалија соработката со Федералното Министерство за трговија, изразувајќи мислење дека таквиот модел на соработка може да послужи како пример за другите министерства, со цел да се донесат оптимални решенија кои ги задоволуваат интересите на вработените и работодавачите.
