Претставници на американската централна банка (ФЕД) започнуваат дводневен состанок, бидејќи ескалацијата на конфликтите на Блискиот Исток се заканува да испрати уште еден шок врз цените на стоките, додека се очекува податоците да покажат пад на малопродажбата и слаб раст на индустриското производство во САД во мај.
Денеска, се очекува Федералните резерви да ја задржат основната каматна стапка во опсег од 4,25 до 4,50 проценти, каде што е од декември, и нема да дадат прецизни насоки сè додека не биде јасно дали увозните тарифи и фискалната политика на американскиот претседател Доналд Трамп ја зголемуваат инфлацијата, го забавуваат економскиот раст или, како што тврди администрацијата на Трамп, придонесуваат за стабилен раст, а воедно ги намалуваат цените. Трамп бара итно намалување на каматните стапки, објавува Ројтерс.
Сепак, најновите интензивни ракетни судири меѓу Израел и Иран ја зголемија неизвесноста, бидејќи доведоа до скок на цените на нафтата, што може да предизвика нов инфлациски притисок. Сепак, во понеделник, цените на нафтата и приносите од американските обврзници почнаа да паѓаат по извештаите дека Иран сака разговори со САД и Израел. Во исто време, главните американски берзански индекси пораснаа.
Судирите, сепак, дополнително ја истакнаа неизвесноста за која претставниците на Федералните резерви велат дека доминирала во нивните дискусии за монетарната политика од почетокот на мандатот на Трамп, особено откако американскиот претседател се впушти во многу поагресивни промени во трговската политика од очекуваното, вклучително и зголемување на тарифите и преглед на глобалните трговски правила.
Во ФЕД преовладува мислењето дека трговската политика на Трамп ќе има стагфлациски ефект, односно истовремено ќе го забави растот и ќе ги зголеми цените. Во таа смисла, ФЕД би можел или да ги задржи каматните стапки на место, или да ги намали, во зависност од тоа кој проблем, инфлација или економско забавување, станува поизразен.
Продажбата на мало, според проценките на аналитичарите, падна за 0,7 проценти во мај, откако потрошувачите брзо купуваа во претходните месеци пред воведувањето на царините, а индустриското производство веројатно порасна само за 0,1 процент, што би укажувало на слабост во секторот.
ФЕД ќе објави нови проекции за економијата и каматните стапки денеска, а претседателот на ФЕД, Џером Пауел, ќе одржи прес-конференција малку подоцна. Овие нови проекции (Резиме на економските проекции) може да привлечат поголемо внимание од самата одлука за каматните стапки, бидејќи аналитичарите сакаат да видат како се промениле ставовите на претставниците на ФЕД од март, кога последен пат објавија проценки.
Фото: Pixabay