Американскиот бизнис магазин Форбс објави листа на „Пет потценети градови кои треба да се посетат на Балканот“, на која покрај Варна во Бугарија, Берат во Албанија, Ниш во Србија и Добој во Босна и Херцеговина се најде и Охрид.
Форбс наведува дека Балканскиот Полуостров е совршен за долг одмор поради неговите живописни плажи, високите планини, низата антички знаменитости за истражување, но и поради тоа што делови од регионот во голема мера се надвор од радарот за меѓународните туристи.
„Сместен во југозападниот тек на Северна Македонија, Охрид е една од ретките дестинации на земјата што служи и како културно и природно место на светското наследство на УНЕСКО“ пишува Форбс. Понатаму во текстот нотира за високата концентрација на вековни цркви во византиски стил, и распространетото Охридско Езеро со разновидна низа на ендемски балкански риби и растенија пронајдени во неговите води. Иако културното наследство на Охрид е секако фасцинантно, оние што се во потрага по мирно бегство во дивината треба да поминат време во истражување на блискиот национален парк Галичица, прекрасен резерват кој е преполн со домашни балкански птици, наведува Форбс.