Ford Kuga за 2026 година добива BlueCruise систем за возење без раце, нови системи за асистенции и хибридни погони
Ford ја претстави освежената верзија на Kuga за 2026 година на европскиот пазар, а најголемата новина е воведувањето на напредниот BlueCruise систем за возење без раце. Додека американскиот Escape полека се повлекува од сцената, неговиот европски „близнак“ продолжува да се развива и да добива нови технологии.
Иако актуелната генерација на Kuga беше претставена уште во 2019 година, а фејслифтот пристигна во 2024, за 2026 нема значајни промени во дизајнот или ентериерот. Во понудата и понатаму остануваат спортските ST-Line изведби со агресивен изглед, како и Active верзиите со робустни детали и заштитни елементи.
Напредна асистенција за возачот
Главниот акцент е ставен на технологијата BlueCruise – систем кој овозможува возење без раце, но со постојано внимание од страна на возачот. Станува збор за Level 2 систем кој управува со воланот, забрзувањето, сопирањето и одржувањето во лента, додека инфрацрвена камера следи дали возачот гледа кон патот.
BlueCruise функционира на претходно мапирани „Blue Zone“ автопати, кои според Ford покриваат околу 95 проценти од автопатската мрежа во 16 европски држави. Системот доаѓа како дел од пакетот Driver Assistance Pack, стандардно во ST-Line X и Active X, а како опција кај Titanium и стандардниот ST-Line. Купувачите ќе можат да го активираат со еднократно плаќање или преку месечна и годишна претплата, со пробен период од три месеци.
Проверена техника и позната кабина
Во внатрешноста нема големи изненадувања. Kuga продолжува со 12.3-инчен дигитален инструмент панел и 13.2-инчен централен екран со најновата SYNC 4 инфозабавна платформа. Погонот останува непроменет, со избор помеѓу целосен хибрид со 2.5-литарски мотор во FWD и AWD конфигурации, како и plug-in хибридна верзија со комбинирана моќност од 240 коњски сили.
Преземено од Автоплус.мк