Германија издвојува 30 милијарди евра за помош на населението од зголемената инфлација, јавуваат светските агенции. Германците ќе плаќаат само 9 евра месечно за јавен превоз, за секој литар бензин ќе добијат попуст од 30 центи, а за дизелот – 14 центи.
Со промените, цените на бензинските пумпи во Берлин веќе паднаа под 2 евра за литар. Бензинот чини 1,88 евра, а дизелот 1,87 евра.
Со зголемувањето на потрошувачките цени кои уриваат нови рекорди во последните месеци, најголемата европска економија ослободува 30 милијарди евра од својата каса за да им помогне на жителите и бизнисите да се справат со кризата.
Германската инфлација достигна нов врв, највисок на сите времиња. Податоците објавени оваа недела покажуваат дека во мај растот на цените во најголемата европска економија изнесувал 8,7% во однос на мај 2021 година, што го зголемува притисокот врз Европската централна банка (ЕЦБ).
Податоците за инфлацијата го зголемуваат притисокот врз германската влада.
Министерот за финансии Кристијан Линднер ја нарече борбата против растот на цените „апсолутен приоритет“, истовремено повикувајќи на крај на експанзивната фискална политика.
„Инфлацијата е огромен економски ризик“, рече Линднер на прес-конференција во Берлин. Министерот за финансии додаде дека земјата „мора да се бори со овој висок ризик за да нема економска криза“.
