Германскиот индустриски конгломерат „ТисенКруп“ прогнозира нето загуба од 400 милиони до 800 милиони евра во тековната финансиска година како резултат на обемното реструктуирање во неговиот оддел за челик.
Компанијата со седиште во Есен предвидува трошоци за реструктуирање од околу 350 милиони евра, главно поврзани со операциите во челичната и автомобилската индустрија, додека се очекуваат парични одливи помеѓу 300 и 600 милиони евра. Акциите паднаа за 13 проценти во вторник наутро.
Планот вклучува намалување на бројот на вработени во челичарниците за 40 проценти, односно 11 илјади работници, и пад на производството од 11,5 на околу девет милиони тони, со инвестиции во технологии со ниски јаглеродни емисии. Овој договор ги поставува темелите за продажба на челичната дивизија, а „ТисенКруп“ преговара со индискиот „Џиндал Стил“.
Концернот поминува низ повеќегодишно реструктуирање со цел одвојување на пет главни деловни единици и трансформирање во холдинг компанија. Продажбата на бродоградбениот оддел претходно оваа година означи чекор напред, но судбината на челичниот бизнис останува неизвесна.