Германскиот извоз во Русија се намали за 45,2 отсто во 2022 година, покажаа податоците на заводот за статистика во петокот, како одраз на последиците од обемните санкции на Западот наметнати на Русија поради нејзината инвазија на Украина.
Приходите од извозот паднаа на 14,6 милијарди евра, објави Дестатис. Како резултат на тоа, Русија падна од 23-то на 15-то место на листата на купувачи на германски стоки. Извозот на машини е повеќе од преполовен, на само 2,8 милијарди евра. Нагло е намален и извозот на хемиски производи, за 43 отсто, на 1,7 милијарди евра.
Лековите станаа најважната извозна стока во 2022 година, при што извозот скокна за речиси 18 отсто, на три милијарди евра, поради повисоките цени. Вредноста на германскиот увоз од Русија се зголеми за 6,5 отсто, на 35,3 милијарди евра, како резултат на наглиот раст на цените на енергенсите и со 41,5 отсто помал обем на увоз.
До втората половина на минатата година, Русија сè уште беше главен снабдувач со енергија на Германија.
На листата на добавувачи на стоки, Русија минатата година падна од 12-то на 14-то место, откри Дестатис.
„Недоволниот увоз на енергија од Русија делумно се компензира со испораки од другите источноевропски земји, особено Казахстан“, објави заводот за статистика.
Минатата година Германија забележа трговски дефицит со Русија од 20,7 милијарди евра, што е најголем од 1992 година. Во 2021 година тој изнесуваше 6,5 милијарди евра.
