Германските домаќинства плаќаат најскапа електрична енергија меѓу земјите од Групата 20 најразвиени светски економии, според анализата на порталот Verivox.
Според овие податоци, просечната цена на електричната енергија за германските домаќинства е околу 35,6 центи за киловат-час, додека просекот за земјите од Г20 е 16,3 центи. Така, електричната енергија во Германија е повеќе од двојно поскапа од просекот.
Меѓу земјите со високи цени се Италија, каде што киловат-час чини околу 34,5 центи, и Велика Британија со 32,4 центи. Во Франција, цената е околу 23,3 центи, а во Соединетите Американски Држави, приближно 18,3 центи за киловат-час.
Значителен дел од сметките на германските домаќинства се состојат од даноци, такси и трошоци за користење на електричната мрежа, кои, според податоците на Verivox, претставуваат повеќе од 60 проценти од конечната цена. Трошоците за набавка на електрична енергија, заедно со трошоците за продажба и услугите на добавувачите, сочинуваат помалку од една третина од вкупната цена.
Енергетскиот експерт Торстен Шторк од Verivox наведува дека производството на електрична енергија сочинува само околу една третина од цената што ја плаќаат домаќинствата.
Високите цени се товар и за стопанството, особено за компаниите со голема потрошувачка на енергија. Во исто време, Германија планира понатамошна електрификација на економијата, додека се очекува поголема употреба на топлински пумпи и електрични возила.
Во јуни 2025 година, германската влада одлучи да го намали данокот на електрична енергија во првата фаза само за одредени групи компании, додека домаќинствата не се опфатени со тоа намалување.
Затоа германските потрошувачи продолжуваат да плаќаат струја по постоечките цени, додека прашањето за можно намалување на даноците за домаќинствата останува отворено.