Скапите извори на енергија сè повеќе ја оштетуваат Германија како индустриска земја. Трендот на преселување на производството во странство е сè поизразен, пред сè кај индустриските компании.
Ова го соопшти Германската индустриска и трговска комора (ДИХК), повикувајќи се на анкета меѓу компаниите, пренесува ДПА.
Според истражувањето, четири од десет индустриски погони размислуваат да го намалат производството во Германија поради високите цени на енергијата или да го преселат во странство.
Во случајот на големите компании со над 500 вработени, пак, дури повеќе од половина размислуваат за таква опција. Според ДИХК, во истражувањето учествувале околу 3.300 компании.
Директорот на ДИХК Ахим Деркс оцени дека политичарите досега не успеале да им понудат на компаниите изгледи за сигурно и достапно снабдување со енергија.
„Иако пред 2023 година, многу компании ја гледаа енергетската транзиција како шанса за сопствено производство, во последно време тоа претставува поголем ризик отколку можност“, рече Деркс.
Скапите енергетски производи, додаде тој, сè повеќе стануваат кочница за производството и инвестициите.
Зголемениот број на планови за намалување на производството и преместување, како и специфичните преселби, покажуваат дека енергетско-политичките производствени услови очигледно негативно влијаат на конкурентноста на компаниите во Германија, наведува ДИХК.
