Холандската компанија за производство на пиво Heineken ја доби својата прва еко – пиварница во светот што е 100% без емисија на штетни гасови, пишува Inhabitat. Станува збор за пиварницата Göss, којашто е лоцирана во Австрија, работи на неколку извори на обновлива енергија и се придржува на еколошки бизнис практики.
Пивото Gösser и понатаму ќе продолжи да се произведува во објектот и да се дистрибуира низ цела Европа, но без јаглеродни емисии во воздухот.
Погонот за производство на пиво го започна своето “зелено“ реновирање уште во 2003 година, за денес целосно да работи потпирајќи се исклучиво на сончевата енергија, хидроенергијата, биогасот и вишокот енергија од една блиска мелница. Потребните состојки за пивото ќе се земаат од најблиската околина, секогаш кога ќе биде возможно, со цел да се заштеди и транспортните трошоци.
Со ваквиот начин на работење, пиварницата се очекува да ги намали емисиите на штетни гасови од 3.000 тони годишно на нула. Новата еко – пиварница е дел од еден поголем проект на Heineken, чија цел е да се намали глобалната емисија на јаглерод диоксид од производството, за 40% до крајот на 2020 година.
