Грција планира да врати повеќе од 7,0 милијарди евра заеми од Меѓународниот монетарен фонд (ММФ) и партнерите од еврозоната во следните два месеци за да спречи банкрот за време на финансиската криза, изјавија двајца грчки претставници за Ројтерс.
Соговорниците на британската агенција, кои сакаа да останат анонимни, изјавија дека Министерството за финансии пред истекот на рокот ќе врати 1,8 милијарди евра долг на ММФ, што е преостанатиот дел од вкупно 28 милијарди евра што овој меѓународен кредитор и ги обезбеди на Грција во два пакети помош помеѓу 2010 и 2014 година.
Дополнително, до крајот на првиот квартал од оваа година ќе бидат отплатени околу 5,3 милијарди евра заеми одобрени од грчките партнери во еврозоната, а кои доспеваат во 2022 и 2023 година.
„Планираме да ја завршиме отплатата во следните два месеци“, рече функционер, додека друг рече дека тоа ќе и помогне на Грција да го намали својот долг кон БДП, сигнализирајќи им на пазарите дека грчката економија е силна и здрава.
Од 2010 до 2015 година Атина доби три пакети финансиска помош од Европската унија и ММФ, во вкупен износ од над 260 милијарди евра.
Откако ја напушти програмата за спас во 2018 година, таа се потпираше исклучиво на должничките пазари за цели на финансирање.
Грција отплатила на ММФ околу 6,0 милијарди евра пред крајниот рок 2019 и 2021 година, а има уште 1,8 милијарди евра неплатени заеми кон Фондот, чиј рок на отплата е до 2024 година.
Владата, исто така, започна минатата година со првите отплати на заемите за спас на партнерите од еврозоната и сака да го забрза темпото на отплата на долгот.
Официјална Атина проценува дека националната економија пораснала за 9,0 отсто во 2021 година, откако економијата закрепна од првиот бран блокади наметнати поради Ковид, и предвидува раст од над 5,0 отсто оваа година.
Грција има околу 32 милијарди евра во резервна готовина, што е доволно за покривање на доспевањето на долгот во следните најмалку три години.
