Забраната за издавање нови дозволи за краткорочно изнајмување во три окрузи во центарот на Атина ќе остане во сила најмалку една година, соопшти грчката влада, истовремено зголемувајќи ги даноците за таквите изнајмувања за одмор.
Како и многу други европски туристички дестинации, Грција се обидува да ја балансира профитабилната индустрија управувана од онлајн платформите како што е Airbnb со потребите на локалните жители кои се соочуваат со недостиг на станови.
Недостигот на станови и зголемените трошоци за живот ги натераа властите да објават одлука овој месец за зголемување на даноците за краткорочни изнајмувања, забрана за нови дозволи во центарот на Атина и охрабрување на сопствениците на имот да се префрлат на долгорочни изнајмувања.
Се очекуваат рекордни приходи од туризмот
Грчката министерка за туризам Олга Кефалогјани најави дека забраната за ново краткорочно изнајмување во Атина ќе стапи на сила од 1 јануари 2025 година.
Дневниот данок на краткорочни изнајмувања и помага на земјата да се справи со влијанието на природните катастрофи поврзани со климатските промени. Во периодот од април до октомври ќе се зголеми од 1,5 на 8 евра, изјави министерот за финансии Костис Хаџидакис. Во зимските месеци данокот ќе се зголеми од 0,5 на 2 евра.
Министерката Кефалогјани рече дека Грција годинава од туризмот очекува приход од 22 милијарди евра, што е уште еден рекорд. Во борбата против масовниот туризам, таа најави уште една мерка – такса во висина од 20 евра за посетителите од бродовите за крстарење кои во екот на летната сезона ги посетуваат островите Санторини и Миконос, а ќе стапи на сила следната година.
