Цените на нафтата утрово малку ослабеа по вчерашниот скок од повеќе од три проценти, но сепак се значително над нивоата пред војната на Блискиот Исток. На лондонскиот пазар, цената на барел Брент падна за 0,01 процент на 111,25 долари, а на американскиот пазар, барел WTI падна за 0,57 проценти, на 99,36 евра.
Преминувањето на танкери низ Ормутскиот теснец – низ кој минува околу една петтина од светската нафта и течен природен гас – останува сериозно нарушено, со засегнати околу 20 милиони барели сурова нафта, гориво и петрохемикалии дневно.
Пазарот беше изненаден од излегувањето на Обединетите Арапски Емирати од ОПЕК, но очекува дека остатокот од картелот на производители на нафта веројатно ќе остане заедно.
„Во кој било друг ден, оваа вест можеше веднаш да го намали Брент за 5 до 6 долари, со оглед на тоа што ОАЕ учествува со околу 10 проценти во производството на ОПЕК. Сепак, со оглед на тоа што производствените капацитети на ОАЕ моментално се блиску до капацитетот, можеби не е изненадување што фјучерсите на Брент брзо го избришаа почетниот пад“, рече Крис Вестон, раководител на истражувањето во Pepperstone Group Ltd во Мелбурн.
На валутните пазари, индексот на доларот, кој ја покажува вредноста на американската валута во однос на шесте најважни светски валути, зајакна втор ден по ред за мали 0,17 проценти, на 98,67 поени.
Во исто време, девизниот курс на еврото ослабе за 0,08 проценти во однос на доларот, на 1,1706 долари, а девизниот курс на јенот за 0,25 проценти, на 159,62 јени.
Вниманието на пазарот е насочено кон заклучоците од состанокот на ФЕД во среда, последен со кој претседаваше Џером Пауел. Трговците веруваат дека е сигурно дека каматните стапки ќе останат на сегашното ниво и не очекуваат промена на монетарната политика до крајот на 2027 година.