Луксузот, префинетиот вкус и препознатливата мода се карактеристиките на познатиот француски моден бренд Dior. Тоа се отслика и во најновиот бутик отворен неодамна во Сеул, Јужна Кореја, пишува порталот Pusuitist.com.
“Размислував за тоа како се движат ткаенините, каков е ефектот на ткаење и поради тоа создадов фасада којашто ќе ги истражува тие елементи. Конструкцијата има чувство на движење, коешто си поигрува со светлото. Тоа беше мојата појдовна точка“, објаснува францускиот архитект Кристијан де Портзампарк.
За дизајнот се погрижи францускиот архитект Кристијан де Портзампарк, а свој потпис на внатрешното уредување стави Петер Марино.
Луксузниот објект се протега на шест катови, а главната инспирација за House of Dior доаѓа од високата мода на француската модна куќа.
Дрвото, кожата и лакирани материјали преовладуваат во внатрешното уредување на овој луксузен простор.
Во рамки на House of Dior ќе има и посебен дел за деликатеси, а слаткарот Пјер Херме подготви ексклузивна понуда за модната куќа. Може да се најдат специјалитети од различни егзотични дестинации во светот.
