Хрватскиот туризам минатата година изгуби 5,12 милијарди евра

5

Пандемијата на коронавирусот и одзеде на Хрватска приход од 5,12 милијарди евра од туризам во првите три квартали од минатата година, иако минатата туристичка сезона беше подобра отколку што се надеваа повеќето туристички работници, но и самата влада, кога европските земји воведоа строги епидемиолошки мерки .

Ова го покажуваат податоците на Хрватската народна банка, според кои приходите од извоз на туризам и туристички услуги во трите квартали од минатата година изнесуваат 4,31 милијарди евра, додека во истиот период во 2019 година Хрватска оствари приходи од извоз на туристички услуги од дури 9,435 милијарди евра. Падот е повеќе од 54 %, пренесува Seebiz.

Само во третиот квартал минатата година, Хрватска оствари приходи кои беа за 3,25 милијарди евра пониски отколку во истиот период во 2019 година. Приходите во третиот квартал од 2019 година беа 6,626 милијарди евра, додека минатата година беа 3,37 милијарди евра.

Епидемиолошката состојба и мерките низ Европа не даваат надеж дека претсезоната, односно првата половина од годината, која ги вклучува велигденските празници на почетокот на април, би можела да биде нешто подобра од минатата година.

Хрватска, како и другите туристички земји, се надеваше на вакцинацијата, но најоптимистичките прогнози велат дека лидерите на ЕУ може да вакцинираат максимум 50% од населението до летото, а сè уште е неизвесно каков ќе биде режимот за патувања и гранични премини во Европската унија.

Фото: Pixabay