Група од 120 британски милионери, меѓу кои и поранешниот фудбалер Гари Линекер и музичкиот продуцент Брајан Ино, го повикаа новиот британски премиер Енди Бернам да воведе повисоки даноци за најбогатите, велејќи дека тие можат да си го дозволат тоа.
Во отвореното писмо, кое го организираше иницијативата „Патриотски милионери“, потписниците истакнуваат дека не се залагаат за повисоки даноци за граѓаните кои живеат од плата, туку за оние чие богатство и приход произлегуваат од имот.
Милионерски патриоти
„Можеме да си го дозволиме тоа. Не зборуваме за повисоки даноци за луѓето кои работат секој ден за својата плата, туку за најбогатите, чиј приход доаѓа од богатството што го поседуваат“, рекоа тие.
Групата предлага данок од два проценти на средства над 10 милиони фунти, тврдејќи дека тоа ќе ја намали социјалната нееднаквост и ќе обезбеди средства за нови јавни инвестиции.
„Милионерите се патриоти. Ние ја сакаме оваа земја и сакаме таа да биде успешна. Но, успехот бара инвестиции, а значаен дел од неискористениот капитал е токму во богатството што денес не се оданочува“, се наведува во писмото.
Повикот доаѓа неколку дена откако новиот премиер Енди Бернам не ја исклучи можноста за данок на богатство. Одговарајќи на прашање од Гари Линекер пред да ја преземе функцијата, тој рече дека во иднина можеби ќе „побара малку повеќе“ од оние кои имаат најмногу, пишува Би-Би-Си.
Повеќето ја поддржуваат идејата
„Патриотски милионери“ веруваат дека на Обединетото Кралство му е потребна прераспределба на богатството и моќта од најбогатите за да може да инвестира повеќе во развојот на сите региони во земјата. Групата се повикува на сопствено истражување, според кое мнозинството британски милионери поддржуваат повисоки даноци на сопственото богатство.
„Сè уште има неколку луѓе кои се заробени во застарено економско размислување и оние очајни да го задржат секој денар за себе. Оние кои не можат да видат подалеку од сопствените интереси не треба да ја обликуваат иднината на Велика Британија“, се вели во писмото.
Меѓу потписниците се режисерот Ричард Кертис, автор на филмот „Нотинг Хил“, и Иан Грег, поранешен извршен директор на синџирот пекари Грегс и син на неговиот основач.
