Меѓународната агенција за енергија (ИЕА) предупреди дека огромното зголемување на употребата на климатизери ќе има едно од најголемите и најнепредвидливите влијанија врз електроенергетските мрежи во светот во следната деценија.
Истражувачите на ИЕА велат дека комбинацијата на зголемените приходи во земјите во развој и повисоките температури поради климатските промени значи дека потрошувачката на електрична енергија за домашните климатизери ќе се зголеми повеќе од моменталната вкупна потрошувачка на електрична енергија на Блискиот Исток, пишува Фајненшл Тајмс.
Во својот извештај, ИЕА ги зголеми своите прогнози за побарувачката на електрична енергија, предвидувајќи дека потрошувачката до 2035 година ќе биде шест отсто поголема од проценетата минатата година.
Во извештајот се наведува дека климатизерите ќе бараат дополнителни 697 терават часови (TWh) електрична енергија до 2030 година, што е повеќе од три пати поголема од дополнителната побарувачка во споредба со центрите за податоци. Електричните возила, од друга страна, ќе бараат дополнителни 854 TWh.
Променливоста на побарувачката за клима уреди значи дека тие ќе имаат најнепредвидливо дневно влијание врз електричните мрежи. Фатих Бирол, директор на ИЕА, истакна дека многу носители на одлуки не сфаќаат колку се клучни климатизерите за потрошувачката на електрична енергија на глобално ниво.
Во САД и Јапонија, 90 отсто од домаќинствата имаат клима уреди, додека тој процент е пет отсто во Нигерија, 15 отсто во Индонезија и помалку од 20 отсто во Индија. Со зголемувањето на приходите и зголеменото влијание на климатските промени, сè повеќе луѓе купуваат клима уреди, што станува главен фактор за растот на потрошувачката на енергија.
Дури и во сценарио кога владите ги исполнуваат своите обврски за климата, потрошувачката на енергија за клима уредите ќе се зголеми за речиси 200 проценти. Најголем дел од овој раст на потрошувачката на енергија ќе се случи во земјите во развој, а побарувачката би можела да биде уште поголема доколку климатските промени доведат до почести топлотни бранови.
