Хрватскиот град Света Недела за своите службеници воведува фиксен и варијабилен дел на платата којшто ќе зависи од тоа какви оценки добиле од граѓаните. Овој револуционерен потег го најави на својот службен профил градоначалникот Дарио Зуровец.
Света Недела, инаку е позната по даночните олеснувања, но и по бројните успешни компании кои работат во овој град. Освен оценувањето на службениците и новиот систем на плати, овој град близу Загреб, воведува и ново ниво на транспарентност, па граѓаните ќе имаат пристап до сите сметки коишто градот ги плаќа и договорите коишто ги склучува.
“Први во Хрватска воведуваме оценување на вработените од страна на граѓаните и плати и награди според оценките, со што воведуваме фиксен и варијабилен дел на приход. Претставивме апликација преку која граѓаните ќе може да ги оценат вработените по користењето на услуги во градската администрација“, напиша Зуровец.
Вработените во градската администрација ќе може и меѓусебно да се оценуваат, а резултатот од тој процес ќе биде ранг – листа на вработените според оценките.
Оценувањето на вработените ќе започне од први март 2020 година, а ако градскиот совет ја усвои таа одлука, тоа ќе се види на платите на вработените на први јули годинава.
Фото:Pixabay
