Intel ќе инвестира 95 милијарди долари во производство на чипови во Европа

28

Еден од водечките светски производители на компјутерски компоненти, американската Intel Corp., планира да изгради фабрики за чипови во Европа и ќе одели до 95 милијарди долари за овие цели.

Извршниот директор на Intel, Пет Гелсинxер, изјави дека компанијата има намера да изгради две фабрики за микропроцесори на нова локација, со потенцијал да го прошири производството.

Во исто време, вкупната инвестиција за оваа намена за 10 години ќе се зголеми на еквивалент од 80 милијарди евра.

Новиот капацитет ќе одговори на рапидно растечката побарувачка за полупроводници, бидејќи компјутерите, автомобилите, разните мобилни уреди и другите гаџети имаат се поголеми барања кон чиповите, пишува The Wall Street Journal.

„Оваа нова ера на силна побарувачка за полупроводници бара смело и амбициозно размислување“, рече Гелсинџер на IAA Mobility Motor Show во Минхен.

Најголемите конкуренти на Intel, како што е Taiwan Semiconductor Manufacturing Co. и Samsung Electronics Co., претходно рекоа дека имаат намера да потрошат значителни суми за да изградат производствени капацитети во наредните години.

Неодамна, глобалниот недостаток на чипови ги погоди производителите на автомобили, кои беа принудени да го намалат обемот на производство, да престанат со работа или да префрлат вработени на скратено работно време.

Intel, исто така, рече дека планира да ја користи својата производствена база во Ирска за производство на чипови за автомобили. Компанијата ќе формира и тим за развој на чипови за да им помогне на другите продавачи да ги прилагодат своите производи за да можат да ги користат производствените капацитети на Intel.

Гелсинџер предвидува дека пазарот на автомобилски чипови ќе се удвои до крајот на деценијата. Полупроводниците ќе учествуваат со повеќе од 20% од трошоците за производство на премиум автомобили, наспроти 4% во 2019 година, рече тој. Ова е затоа што новите опции за поддршка на возачот, светлите екрани на допир и другите компјутерски интензивни функции стануваат подостапни и пошироко распространети.

Во март, извршниот директор на Intel вети изградба на две фабрики во Аризона по цена од 20 милијарди долари. Компанијата, исто така, одвои 3,5 милијарди долари за проширување на производствените капацитети во Ново Мексико.