Минатата година, Германија ја забележа својата најниска стапка на нето инвестиции од повторното обединување во 1990 година, бидејќи инвестициите од страна на бизнисите, државата и граѓаните не беа доволни за да се компензира амортизацијата на постојните средства.
Според податоците од германското Министерство за економија и Федералниот завод за статистика (Дестатис), нето стапката на инвестиции во основни средства во 2025 година изнесуваше минус 0,23 проценти од бруто домашниот производ, објавува „Виршафтсвохе“.
Станува збор за инвестиции во градежништво, машини, опрема и инфраструктура, кога отписите на постојните основни средства ќе се одземат од новите инвестиции.
Податоците покажуваат долгорочен тренд на намалување на инвестициите во однос на големината на германската економија, се додава во соопштението.
Во периодот од 1991 до 1999 година, просечната стапка на нето инвестиции изнесуваше 7,31 процент од БДП, од 2000 до 2009 година падна на 2,88 проценти, додека помеѓу 2010 и 2019 година изнесуваше 2,29 проценти од бруто домашниот производ.
Според извештаите, помеѓу 2020 и 2025 година, просечната стапка на нето инвестиции во Германија дополнително ослабе на 1,02 проценти.
Претставникот на левицата, Џем Инџе, оцени дека Германија „се троши“, посочувајќи на запуштените училишта, лошите патишта и пропаѓачката инфраструктура.
Тој рече дека граѓаните на Германија ги чувствуваат последиците од недоволните инвестиции секој ден и го повтори барањето за воведување данок на богатство и започнување нови инвестиции.
Институтот за германска економија од Келн, кој е близок до работодавците, исто така предупреди за долгорочната слабост на инвестициите.
Директорот на институтот, Хубертус Барт, рече дека бруто-инвестициите во основни средства се под вистински притисок со години, особено во градежниот сектор.