Министерот за надворешни работи на земјава, Никола Димитров, упати апел до сите македонски граѓани кои во моментот се наоѓаат во странство, а посебно до оние кои немаат регулиран престој, немаат начин како да се вратат дома.
Подолу, интегрално го пренесуваме апелот на МНР Димитров.
Почитувани македонски граѓани кои во моментов сте во странство, посебно вие кои немате регулиран престој и поради вонредно тешките околности насекаде, откажани летови и затворени граници, немате начин како да се вратите дома, во татковината.
Се обидуваме да најдеме правилен начин да ви помогнеме да се вратите, но секој сериозен напор, претпоставува точни информации.
На пример, има наводни информации за 150 граѓани затекнати во Барселона, додека во овој момент во Амбасадата на Северна Македонија во Мадрид има само 16 пријавени.
Затоа, ве замолувам ажурно да се пријавите во дипломатско-конзуларните претставништва во земјата каде сте затекнати, или во најблиското ДКП доколку таму немаме мисија. Емаил адресите на ДКПта се достапни на сајтот на МНР тука https://mfa.gov.mk/ (ако го отворате на мобилен телефон видете подолу на сајтот).
Потребни податоци:
– име и презиме
– број на патна исправа
– контакт телефон
– земја и град каде се наоѓате
– дали имате регулиран престој во која било странска држава
Бидејќи ќе правиме пресек на состојбата за 24 часа, ве замолувам тоа да го сторите до утре до 17 часот (четврток 19 март 2020 год).
Ќе направиме сè што можеме, водејќи сметка и за државниот интерес да се грижиме за македонските државјани затекнати во тешка ситуација во странство и за државниот интерес да се чува здравјето на нацијата дома.
Фото: Pexels
