Креативното решение за брендирање на гроздовиот мед на винарската визба Тиквеш на дизајнерот Гаспер Стерн од Словенија е победник на меѓународниот конкурс организиран од Skopje Design Week (SDW) и Тиквеш.
На јавниот повик кој беше објавен пред три месеци, свои креативни решенија доставија 101 креативец од најразлични земји. Стручното жири имаше навистина тешка задача да го одбере најсоодветното дизајнерско решение од вкупно 202 кои пристигнаа на адресата на SDW.
“Големиот број исклучително квалитетни креативни решенија уште еднаш го потврдува високото реноме што го има Тиквеш, како производител на уникатни автентични производи со врвен квалитет, но и како своевиден амбасадор на Македонија и нејзините убавини во светот“, изјави Орде Ивановски од Тиквеш.
Победничкото дизајнерско решение, кое доби парична награда од 2.000 евра ќе биде искористено за брендирање на новиот производ на Тиквеш кој ќе биде пласиран на пазарот под името Гроздов мед Grapelixir (Грејпеликсир).
“Високата естетика и оригиналниот пристап употребен во дизајнерските решенија потврдуваат дека гроздовиот мед на Тиквеш поседува исклучителен и пред се уникатен идентитет и висока вредност што дизајнерите го препознале и совршено го преточиле во овие решенија за брендирање“, потенцираше Ивановски, искажувајќи го уверувањето дека отсега Тиквеш, освен по своите врвни вина, ќе биде препознаен од потрошувачите и како производител на гроздов мед со одличен квалитет и полезни состојки за здравјето на луѓето.
Искажувајќи задоволство од соработката со Тиквеш, како и од квалитетот на сите пристигнати дизајнерски решенија, директорот на Skopje Design Week, Александар Велиновски истакна дека стимулирање на соработка помеѓу една светска компанија и дизајн секторот е предизвик за нив како организација.
“Жирито воопшто немаше лесна задача бидејќи во период од два месеци пристигнаа огромен број на предлози за гроздовиот мед, од врвни дизајнери до најмлади креативци. Вистинска штета е што само еден е победник. Интересот за учество во ваков тип на соработка расте и тоа ме куражи, следната година повторно да пласираме предлог модел за соработка помеѓу дизајн секторот и винарницата Тиквеш“, рече Велиновски.
Ова е втора соработка од ваков вид меѓу Тиквеш и Skopje Design Week. Минатата година беше објавен меѓународен натпревар на кој беше избрано уникатно дизајнерско решение за виното Шардоне на Тиквеш. Задоволни од резултатите и успехот од досегашната соработка, од Тиквеш и SDW најавуваат дека и понатаму ќе продолжат да вложуваат во креирање силна синергија меѓу бизнис секторот и креативната индустрија.
