Европската забрана за увоз на руски гас и нафта носи ризик од пораст на светските цени на енергијата, предупреди американската министерка за финансии Џенет Јелен, повикувајќи ја Европа да ја намали својата зависност без „да ја казнува целата планета“.
„Треба да бидеме внимателни со целосната европска забрана за увоз на нафта“, рече таа.
„Ако можеме да најдеме начин да го направиме ова без да ѝ наштетиме на целата планета со зголемување на цените на енергијата, тоа би било идеално, тоа е прашање за кое се обидуваме да размислиме заедно“, додаде таа.
Европските земји се обидуваат да ја намалат зависноста од увезената руска нафта и гас со цел да ја казнат Русија за инвазијата на Украина.
Но, тоа ќе ги зголеми светските цени на нафтата и тешко ќе ја погоди Европа и другите делови од светот, предупреди Јелен.
Сепак, таа потврди дека продажбата на нафта и гас е важен извор на приход за Русија и дека би било многу корисно да се најде начин да се намалат руските приходи, што е целта.
„Во случајот со нафтата и природниот гас, ситуацијата во Европа е јасно различна од онаа во САД. Забранивме увоз на сите видови руска енергија, но увезуваме многу малку од Русија. Тоа не е случај со Европа“, рече Јелен, оценувајќи дека е јасно дека Европа треба да ја намали својата енергетска зависност од Русија на среден рок.
