Јужнокорејскиот претседател Јун Сук-Јол се сретна со извршниот директор на Tesla, Илон Маск во Вашингтон, за да разговараат за инвестициите во неговата земја, соопшти кабинетот на јужнокорејскиот претседател.
Тие се состанаа на барање на Маск додека Јун е во шестдневна државна посета на Соединетите држави, рече високиот економски секретар на Јун, Чои Санг-мок.
Јун зборуваше за Јужна Кореја како идеална земја за Тесла да ја изгради гигафабриката, наведувајќи ги најсовремените индустриски роботи во земјата и висококвалификуваните работници, рече Чои.
– Претседателот Јун исто така рече дека активно ќе ја поддржува Тесла во однос на локацијата, човечките ресурси и даноците доколку донесе одлука за инвестирање – изјави Чои на новинарите.
Според Чои, Маск му рекол на Јун дека Јужна Кореја останува еден од главните кандидати за гигафабриките на Тесла и дека ќе има можност да ја посети азиската земја.
Тесла и Маск не одговорија веднаш на барањето за коментар. Џун изјави за Ројтерс во ноември дека Јужна Кореја ќе понуди „прилагодени“ стимулации и ќе ги ублажи сите ризици за да ги поттикне инвестициите на Тесла, неколку дена откако тој имаше видео повик со Маск. Во март оваа година, Маск објави дека Тесла ќе изгради нова фабрика во Мексико, што ќе биде првиот производствен капацитет надвор од САД, Германија и Кина. Како потенцијални кандидати за новата фабрика на Тесла се наведени и Канада и Индонезија.