Јахтите на руските олигарси веќе ги нема ниту во Црна Гора, ниту на Малдиви
Олег Дерипаска вчера ја преместил својата „Clio“ во залив во близина на југозападното турско одморалиште Гочек, објави Ројтерс.
Агенцијата вели дека многу руски милијардери се упатуваат кон Турција за да ги избегнат западните санкции врз Русија поради нејзината инвазија на Украина.
Дерипаска, основачот на рускиот алуминиумски гигант „Русал“, е санкциониран од САД, Европската унија и Обединетото Кралство. Неодамна повика на мир, потсетува „Стандард“.
Јахтата долга 73 метри плови под знамето на Кајманските Острови и го носи името „Clio“. Таа беше забележана во близина на одморалиштето во Егејското Море откако прво беше во Шри Ланка, а потоа на Малдиви.
Јахтата пристигнува во Заливот на Турција откако две суперјахти поврзани со друг руски милијардер, Роман Абрамович, кој изненадувачки се појави на преговорите меѓу Русија и Украина во Истанбул, веќе се закотвени во турските пристаништа – Solaris и Eclipse.
Странските влади се обидуваат да го изолираат претседателот Владимир Путин и неговите другари поради инвазијата на Украина, која Кремљ ја нарекува „специјална воена операција“, наведува агенцијата.
Турција, членка на НАТО, има поморска граница со Русија и Украина во Црното Море и одржува добри односи со двете земји, посредувајќи во решавањето на конфликтот.
Анкара го поддржува Киев, додека се противи на санкциите против Москва, вклучително и мерките против руските милијардери, пишува Ројтерс.
Турција во голема мера се потпира на рускиот увоз на енергија и руските туристи и станува безбедно засолниште за бегство на руски граѓани, од кои многумина инвестираат во недвижен имот.
Во петокот, украински дипломат рече дека Украина работи со Турција за поголема поддршка, но ја разбира реалноста дека Анкара има паралелни врски со Москва, додаде агенцијата.
