Кога се обидувате да рекламирате, односно продадете некој производ треба да внимавате на многу работи. Сигурно не би сакале да бидете наметливи, да испаднете смешни или да изгледате недоверливо. За да не направите грешка, следете ги следниве совети.
Доказ од корисници
Треба да прикажете релевантни и вистинити искази за вашите производи, односно да се водите од тоа што купувачите велат за вашата компанија. Тоа може да го направите преку сведоштва од клиенти, коишто ќе ги искористите како реклама. Можете да ги презентирате и лајковите, споделувањата и коментарите на социјалните медиуми во самата реклама.
Не претерувајте
Не мора да ги користите последните вирални трендови само за да дојдете до повеќе споделувања. Не значи дека ако нешто одговара за одредена компанија ќе одговара и за вас. Држете се до својот бренд и не подлегнувајте на евтините трикови кои не се автентични.
Без навреди
Добро внимавајте на секој сегмент од кампањата. Доколку не сте сигурни дали имате некој навредлив елемент, испитајте ја прво со луѓето од компанијата. Во вакви случаи добро е да се прашаат луѓе од различни култури и потекло со цел да се добие вистинска информација.
Внимавајте со фотографиите
Не одбирајте веќе видени фотографии што долго време кружат онлајн. Вашите реклами треба да се повеќе од тоа. Доколку не можете да си дозволите професионален фотограф, прочепкајте малку низ интернетот. Ќе најдете веб страни како Unsplash, Pexels и Pixabay од каде можете да преземете бесплатни и квалитетни фотографии што се подобри од другите неплатени алтернативи.
Без граматички грешки
Компанијата што не умее да состави правилна реченица без граматички грешки нема да заслужи многу доверба и почит од клиентите. Луѓето ќе помислат дека не сте сериозни, работите непрофесионално и нема да сакаат да купат ваш производ.
Бидете реални
Бидете искрени. Не ветувајте тоа што не можете да исполните. Луѓето денес и онака се скептични за многу работи и не им требаат дополнителни лаги. Многу е подобро да бидете транспарентни во врска со тоа што го нудите. Тоа е вистинскиот начин да изградите доверба кај клиентите.
Фото: Pixabay
