Фото: Pexels
Добивањето идеи додека не сте на работа и нивно запишување е добро, но ако размислувате и се окупирате со работни обврски кои ве држат будни во текот на ноќта, тоа е сериозен проблем. Бидејќи поголемиот дел од времето го поминувате на работа, честопати е тешко да заборавите на сите работи и задачи кои треба да се исполнат. Современата технологија и “исчезнувањето“ на строгото работно време влијаат на тоа работните обврски да се носат дома. Без разлика дали ќе понесете дома задачи кои треба да ги извршите или работните обврски ви се во глава, треба да поставите граница и одредите време во кое нема да работите.
“Носењето“ на работата дома или кога сте на одмор може да донесе непродуктивност. Работодавачите сакаат посветени работници и можеби би ве пофалиле за вашата ангажираност, но креативноста не функционира на тој начин. Не може добро да се одморите и да бидете ефикасни ако не ја исфрлите работата од вашите мисли. Посветете си време за себе си во кое ќе се релаксирате.
Овие неколку совети ќе ви помогнат да заборавите на работата кога не работите и да ги наполните батериите за остварување на нови успеси.
Подгответе план за релаксирање
Кога се враќате од работа, планирајте како ќе го поминете остатокот од денот. Ако се враќате пеш, кога ќе поминете покрај парк, не го заобиколувајте, туку прошетајте низ него. Слушајте ја омилената музика ако се враќате со автомобил или читајте книга или списание доколку го користите јавниот превоз.
Не зборувајте за работа
Не почнувајте разговор со семејството или пријателите за вашата работа кога ќе се вратите дома. Наместо тоа прашајте ги како тие го поминале денот. Фокусирањето на другите луѓе и нивните потреби е добар начин да ги оттргнете вашите мисли за работата.
Мислете на решавање други проблеми
Најдобар начин да заборавите на проблемите од работа е да ги замените со други проблеми. Тие не мора да бидат сериозни. Планирајте и размислувајте за работите кои ве чекаат кога ќе се вратите дома.
Оставете ги проблемите за подоцна
Ако не можете да побегнете од работата, одредете време кога ќе се ангажирате за довршување на работата дома. Прво погрижете се за себе и своите потреби.
Престанете да ја носите работата дома
Кога не успевате да ги завршите сите задачи на работа, не ја носете работата дома. Ако сакате да заборавите на работата, мора да ја оставите во канцеларија. Обидете се да ги довршите обврските кога сте на работа, а вашето слободно време да биде зона без деловни грижи.
