Романија сè повеќе се профилира како сериозен кандидат да стане новата технолошка и индустриска сила на континентот. Со години, Романија е под радарот на глобалните компании кои бараат компетентна работна сила, добра дигитална инфраструктура и пазар со капацитет за раст.
Според најновите податоци, бројот на експерти во ИТ секторот се зголемил четири пати во последната деценија, додека компаниите се високо рангирани во извозот на софтверски решенија и услуги. На пример, се проценува дека ИТ и ИКТ секторите во Романија ќе ја надминат вредноста од околу 1,3 милијарди долари во 2025 година, со тренд да учествуваат со значителен дел од БДП во наредните години.
Градови како Клуж-Напока, Темишвар и, секако, главниот град Букурешт, се претвораат во технолошки центри каде што мултинационалните компании отвораат центри за развој, а локалните стартап екосистеми привлекуваат инвестиции.
Голем број познати компании
Денес, во Романија работат бројни глобални корпорации од ИТ и ИКТ секторот, кои отворија центри за развој, инженерство и производство тука. Меѓу нив се IBM, Microsoft, Oracle, Amazon, HP, Ericsson, Intel, Dell и Huawei, но и европски гиганти како Bosch, Continental, Siemens и Capgemini.
Овие компании вработуваат десетици илјади експерти, а повеќе од 200 мултинационални ИТ компании кои извезуваат софтверски решенија низ целиот свет работат само во Букурешт и Клуж.
Нивното присуство ја направи Романија еден од најважните центри за аутсорсинг и ниаршоринг во Европа, но и пазар кој сè повеќе развива свои технолошки производи и патенти.
Стратешка позиција и индустриска еволуција
Освен „меките“ сегменти како што се ИТ и дигиталните услуги, Романија доживува раст и во производствените индустрии. Благодарение на членството во ЕУ и географската положба – на раскрсницата на Балканот, Црното Море и Централно-источна Европа – таа станува цел за инвеститорите кои сакаат фабрики поблиску до пазарот на ЕУ.
Еден од добрите примери е договорот со германскиот Рајнметал за изградба на фабрика за производство на барут во вредност од 535 милиони евра, што покажува дека Романија повеќе не е само „аутсорсинг дестинација“, туку и место за сериозно индустриско производство, пренесув Бизнисинфо.ба.