Германскиот производител Daimler Truck работи на камион со горивни ќелии што работи на течен водород и кој ќе има опсег од 1.000 километри со полн резервоар, објави компанијата во понеделникот.
Првичните тестови веќе започнаа, со цел да се тестираат камионите на водородната флота на пат кон средината на оваа деценија.
Daimler Truck планира да го пушти возилото во производство во втората половина на деценијата.
Камионската индустрија е под притисок од ЕУ да ги исполни обврзувачките цели за заштита на климата. Од новите модели се бара да испуштаат просечно 15% помалку јаглерод диоксид до 2025 година и најмалку 30% до 2030 година, во споредба со 2019-2020 година.
Производителите ќе подлежат на високи казни во случај овие услови да не бидат исполнети.
Daimler Truck, кој се претставува како лидер на глобалниот пазар на комерцијални возила и вработува над 100.000 луѓе, веќе се обврза да премине од мотори со внатрешно согорување на почисти технологии како што се горивни ќелии и батерии.
До крајот на деценијата, компанијата има за цел да направи возилата без емисии да учествуваат со 60% од продажбата.
Фото: Daimler
